17 urterekin gidatu ahal izango da Europar Batasunean, 2030etik aurrera

Europako Parlamentuak eta Europar Batasuneko Kontseiluak gidatze baimenarekin lotutako hainbat arau adostu berri dituzte. Akordio honen arabera, 17 urteko gazteek ibilgailuak gidatu ahal izango dituzte, furgoneta edo kamioia barne, betiere ondoan esperientziadun pertsona heldu bat dutela.

Gidari berriek bi urteko proba epea izango dute, segurtasunaren inguruko formazioa jasoko dute, eta abiadurarekin eta alkoholarekin lotutako muga eta zigor zorrotzagoak izango dituzte. Halaber, zigor gogorragoak jasoko dituzte segurtasun uhalik gabe gidatzeagatik.

Gidari profesionalen eskasia dela-eta, kamioia bakarka gidatzeko adina 24 urtetik 18ra jaitsiko dute. Autobusetan, aldiz, 24tik 21era igaroko da baimen-ematea.

Bestetik, gidatzeko baimena digitalizatu egingo dute. Hala ere, txartel fisikoa eskatzeko aukera izango da. Autoa edo motorra gidatzeko baimena lortu edo berritu denetik hamabost urteko iraupena izango du. 65 urtetik aurrerakoen kasuan, laburragoa izan daiteke tartea. Autobusei edo kamioiei dagokienez, bost urteko iraupena izango dute.

Europar Batasuneko kideek eta Europako Parlamentuak behin-behineko akordioa berretsi beharko dute orain. Herrialde bakoitzak egin beharreko egokitzapenak eginda, 2030. urtean izango litzateke martxan.