'Flow' pelikulak katu beltzen adopzioa indartu du

Katu beltzak, urtetan zehar, gizartean ez dira oso maitatuak izan. Sineskeria negatiboez inguratuta egon izan dira: zorte txarra ekartzen dutela, sorgin haragiztatuak direla… Baina Flow pelikulak, 2025eko Animaziozko film onenaren Oscar saria irabazi duen pelikulak, sineskeria horiei guztiei itzuli bat eman die. Pelikula estreinatu zenetik, katu beltzen adopzioak gorakada nabarmena izan du. 

Flow pelikulak katu baten istorioa kontatzen du, jende asko hunkitzea lortu duen istorio bat. Uholde baten ondorioz, eraikinen hondakinen artetik, beste animalia batzuekin hasiera berri baten bila dabilen katua da Flow. Bidaia batean murgilduko da eta erronka handiak gainditu beharko ditu.

Pelikularen ondorioz, Estatu Batuetako, Europako eta Latino Amerikako babeslekuek gorakada bat nabaritu dute. Brasileko Ampara Animal Institutua da gorakada hori nabaritu duen babeslekuetako bat, eta sare sozialetan partekatu dute gertaeraren berria. 

Lehen, katu beltzak, normalean, azkenak adoptatzen ziren katuak izaten ziren. Etxe bat topatzen azkenak izaten ziren, beste katuekin alderatuta, denbora bikoitza behar izaten baitzuten familia bat aurkitzeko. Orain, aldiz, askoz ere lehenago aurkitzen dute etxe bilakatuko zaien lekua. 

Modatik haratago

Albiste pozgarria bada ere, Flow pelikulak sortu duen sukar honengatik hemendik denbora gutxira katu beltzak ahantziak ez izatea espero da. Filmak aldaketa bat ekarri du, baina etorkizunean ikusiko da geratzeko etorri den aldaketa izango ote den. 

Joerak agertu eta desagertu egiten dira, joan eta etorri, eta horregatik, litekeena da moda honek, katu beltzak adoptatzearenak, beherakada bat izatea. Ondorioz, katu beltzak lehengo egoerara itzuliko lirateke. Hala ere, pelikulak ia mundu osoan eragin duenez, babeslekuek aldaketak luzaroan irautea espero dutela azpimarratu dute. 

Azken finean, moda eta joerak alde batera utzita, animalia guztiek etxe bat eta familia bat izateko aukera merezi dutela gogoratu dute babeslekuek. Eta animaziozko pelikula batek katu beltzei aukera hori izaten lagundu badie, gizartean hori mantentzea dela hurrengo erronka.