Durangoko Azokako nobedadeak eta planak

2024/12/05

Durangora joango zara baina ez dakizu zer erosi edo zer egin? Hementxe dituzu aukera batzuk.

Durangoko Azokan liburu eta disko nobedade ugari izango dira, egileak sinatzen, aurkezpenak, kontzertuak... Ohiko moduan, zer egin, zer erosi eta zer ikusi erabakitzea izaten da zailena. Hementxe dituzu nobedade eta plan proposamen batzuk.

LIBURUAK

Bihotz-museo bat - Leire Vargas

Leire Vargasek bere bigarren poema liburua plazaratu du. Maitasunaren eta bikotearen ikuspegi hemegonikoarekiko mendekotasun eta sufrimenduaren aurrean, sinesmenak zalantzan jarri, desikasten saiatu eta eraldatzeko prozesuari ekingo dio poemetako ahotsak. Hala, gauzak beste toki batetik egin nahian, kolektiboari begiratuta, maitatzeko eta bizitzeko bestelako moduen bila.

Bisita - Mikel Pagadizabal

Pagadi ezaguna dugu bere umoreagatik, eta liburu honetan ere umore ganberroa da nagusi, zientzia fikzioarekin nahastuta. Plater hegalari bat iritsi da Lur planetara, eta non hartu du lur? Bada, Anoetako bi baserriren arteko soroan. Mundu osoa aztoratuko du gertakariak, bertakoak batez ere. 

Coca-Cola bat zurekin - Beñat Sarasola

Frank O'Hara poetak bere lehen erakusketa zuzenduko du New Yorken, 1960an, Espainiako pintura eta eskulturari buruzkoa. Erakusketarako hautagaien artean daude Oteiza eta Txillida eta euren lana ikustera etorriko da Euskal Herrira, eta Espainiako artista batzuen lana ere aurrez aurre ezagutuko du bidaia berean. Aldi berean, poetak Vincent Warren dantzari eta maitalearekin duen harremanaren nondik norakoak ere aletzen dira giro artistiko eta politikoarekin baitan.

Gazako egunerokoa - Atef Abu Saef. Itzultzaileak: Maialen Berasategi eta Irene Arrarats

 

Atef Abu Saif Gazan jaio zen, baina 2019an, Palestinako Aginte Nazionalak Kultura ministro izendatu zuenean, Zisjordaniara aldatu zen. 2023ko urriaren 7an Gazan zegoen, hamabost urteko semearekin batera. Israelgo armadaren inbasioa tarteko, kale gorrian geratu eta aita-semeek hara eta hona ibili behar izan zuten ihesi, herioari izkin egiten. 85 egunez ibili ziren hala, handik atera ahal izan zuten arte. Egun haietan bizitakori buruzko kronika da hau.

Hetero - Uxue Alberdi

Uxue Alberdik zortzi ipuinez osatutako Hetero liburua idatzi du, heteroarauaren barnean bizitzeak dakartzan erresistentziak, minak eta elkar-elikatzeak islatzen dituztenak. Emakumezkoak dira ia protagonista denak, eta heteroarauak euren gorputzetan, memoria afektiboan eta egunerokoan utzitako arrastoak ageri dira, baita emakumeek euren berau kontserbatzeko egiten dutenaz ere.  Kontraesanak, minak, desirak, botereak eta zauriak agerian ipini eta arrastoa uzten duten narrazioak dira.

Pleibak - Miren Amuriza

Nerabe paisaia rural-poligonero bat, institutuko korridore atenporalak, Morora busean jaistea eta belodromora motorrean igotzea, Hemendik At, Chenoa, Su Ta, lokaleko maromoak eta txosnetako Goi Gerlariak, Largo eta Beda Agarreko sukaldean, erantzun gabeko perdidak, behor hezurrak, istripu bat. Umezaroa elkarri lotuta igaro arren, orain kalean gurutzatu eta ez diote elkarri begiratu ere egiten. Sasoi baten erretratua egiten du Amurizak.

Zoriona, edo antzeko zerbait - Karmele Mitxelena

Emakume alargundu berria Mediterraneora joan da, doluaren zama arindu nahian. Egunerokoan gertatzen zaizkionak eta iraganeko oroitzapenak lotzen dira bertan. Bidaia fisikoa eta psikologikoa da, eta maitasuna, heriotza, seme-alabak... dira harilkatzen diren gaietako batzuk. 

Zoo - Goiatz Labandibar

Kanpineko paisaia eta fauna islatu du Labandibarrek ipuin-bilduma honetan, jostalari eta zorrotz: paraje urruneneko kanpin galduenera bakardade bila doan familia, igerilekuko monitore gisa xox batzuk atera nahi dituen ikaslea, parranda-asmotan dabilen gazte-taldea, tribu osoa inguruan biltzen duten matriarkak, autokarabanak elkarri erakutsiz lehiatzen diren bikoteak, lehenbiziko muxua, lehenbiziko ligea, lehenbiziko adar jartzea probatuko duena…

DISKOAK

Atenporal - Esti Markez

Esti Markezen bigarren lan luzea da, bukaera eta hasierei buruzkoa. Kantu klasiko eta modernoak daude, eta melodia eta ahots goxoak. Bederatzi kantuz osatutako lana da, eta merezi du entzutea.

Basati - Benizze

Beñat Goitia gasteiztarrak Benizze sortu zuen 2022an. Paradisu Zinema Musika Beka irabazi zuen eta haren babesean egindako lana da. Ñabardura askotako musika elektronikoa, oso ikusgarria eta oso esplizitua.

Belharra - Bengo

Bengok bere alderdi pertsonalena islatu du disko honetan. 'Belharra' Urruñan sortzen den olatu erraldoia da, ezohiko fenomenoa, eta olatu hori aurrera jarraitzearen metafora da artistarentzat. 

Ez da besterik - Marte Lasarte

Ez Da Besterik Marte Lasarteren lehen albuma da. Indie pop-rock soinuetatik, new wave, drum 'n' bass eta punk-rock fuzzero soinuen artean dabiltza dantzan. Proposamen freskoa.

HHH - Eneritz Furyak

Elektronika, esperimentazioa eta popa uztartzen ditu Eneritz Furyak musikariaren hirugarren lan luzeak.
 
Ezpatei distira - Tatxers

2019an sortu zen Iruñeko taldea eta hurrengo urtean atera zuten maketa. 2021ean Hiruzpalau amets larri EPa kaleratu zuten, iaz Tatxers eta orain Ezpatei distira! azken lana atera berri dute.
 
Errekak nola - Bananas
Bananas taldearen azken lana da hau, Errekak nola, martxoan kaleratua. Disko honek errekaren urak bezala eramaten zaitu, aurreraka, letren sakontasun eta jokoan murgilduta, eta barruko zaurien gazitasuna gezatuz. 
 
 Izaro Gabonetan - Izaro Andres

Izarok zortzi gabon kantu idatzi ditu eta bigarrenean, Olentzero izenekoan, Pirritx, Porrotx eta Marimots ditu bidelagun. Abenduan Donostiako Kursaalen aurkeztuko du, bi kontzertutan.
 
Lore - Janus Lester
Jokin Pinatxo nafarrak Lore diskoa argitaratu berri du. Une ilunak onartzeko beharrari buruz hitz egiten duen lana da, "hazteko eta loratzeko ezinbesteko urrats" gisa ikusten baitu.
 
Orube - Izaki Gardenak

Duela sei urte aurkeztu zuen Izaki Gardenak taldeak euren azken diskoa, Dena oskol izenekoa. Bestelako proiektuetan ibili ondoren, bueltan dator berriz, kantu berriz osatutako diska eskuetan duela. Gitarra efektuak eta ukitu elektronikoak ere topatuko dituzu diskoan.
 
Zainak eman - Olatz Salvador
Olatz Salvadorren hirugarren diskoa da, 10 kantuz osatua, eta Izaro eta Alba Morenarekin kolaboratu du kanta banatan. Katixa Agirreren hitzetan, "orain arteko bere lanen artean elektronikoena eta basatiena. Mugak aztertzen dituen lana, dudarik gabe". 
 
EKINTZAK
Plan ugari egin daitezke azokan, hona hemen horietako batzuk: