Euskaltzaleen Topaguneak 'Gau Beltza'-ren inguruko online formazio saioa antolatu du
Usadio honen jatorriaz eta balioez arituko dira eta doakoa izango da.
Euskaltzaleen Topaguneak Gau Beltzaren inguruko doako online formakuntza saioa egingo du irailaren 25ean. Urriaren 31n ospatzen da Gau Beltza, iluntzean, Euskal Herriko gero eta herri gehiagotan. Azken urteetan ohitura zaharrak berreskuratuz, jaia berrasmatzen ari dira herriz herri. Euskaltzaleen Topaguneak baliabideen kutxa eta www.gaubeltza.eus webgunea sortu du. Bertan gau honen inguruko informazioa, unitate didaktikoa, dokumentala eta abar daude jasota.
Honen harira egingo dute ikastaroa ere. Ospakizun horren inguruko ezagutzan sakondu nahi duen orori zuzendua dago. Josu Ozaita antropologoak Gau Beltzaren jatorriaz hitz egingo du, eta Mitxel Elortza irakasle eta idazlea, berriz, ospakizunaren inguruko balioez arituko da.
Saioa sarean izango da, irailaren 25eko 18:30etik aurrera, eta parte hartu ahal izateko esteka honetan eman behar da izena.
Bideoak sarean
Ospakizunaren inguruko zortzi bideo motz ere zabaldu ditu Euskaltzaleen Topaguneak, Youtubeko euren kanalean, ospakizunak bere baitan biltzen dituen ezaugarri ezberdinak eta ospatzeko moduak ezagutzera emateko. Webgunean bertan ikusi eta deskarga daitezke.