Ezpalak taldeak 'Nola ahaztu' singlea kaleratu du
Bizitzako aldaketei buruzkoa da kantua eta bideoklipa ere zabaldu dute.
Azaroan argitaratuko du Ezpalak taldeak Gatza, estudioko bere laugarren diskoa, eta Nola ahaztu aurrerapen kantua kaleratu berri dute.
Nola ahaztu abestia gitarra riff indartsu batean oinarrituta dago, laurogeiko hamarraldiko punk ondorengo ukitu ilunak dituzten zati melodikoekin eta zarata handiarekin, 90eko hamarkadako Grunge taldeen erara. "Aldaketari buruz hitz egiten du, atzean uzten ditugun gauzez, geure buruari oztopoak jartzeaz eta hori guztia aldatzeko moduaz", azaldu dute taldekideek.
Ezpalak taldeko kidea den Eñaut Gaztañagak ekoiztu, nahastu eta masterizatu du abestia, Gaztain Estudioetan (Zestoa). Holy Fire Design Studioko Alain Martínezek zuzendu eta editatu du bideoklipa.
Rock alternatiboa egiten duen Ezpalak talde zestoarra 2019an sortu zen eta hiru lan kaleratu dituzte: Ezpalak (2019), Kolpatu topatu (2021) eta Hortz aina hots (2022). Udazkenean iritsiko da disko berria.
Juanjo Berasain (ahotsa), Eñaut Gaztañaga (gitarra), Unai Eizagirre (baxua) eta Janardana Iglesias (bateria) dira Ezpalak taldea osatzen duten musikariak.