Gazteei zuzendutako mikrokontakizunen lehiaketaren hirugarren edizioa antolatu du Lumafest!-ek

Gipuzkoako Foru Aldundiko Kultura Departamentuak LUMAfest! Gipuzkoako gazte-literaturaren eta gazte-sorkuntzaren jaialdiaren hirugarren edizioa jarri du martxan. Irailaren 12, 13 eta 14an izango da jaialdia Koldo Mitxelena Kulturgunean, orain Donostiako Alde Zaharreko Santa Teresa komentuan kokatuta dagoena.

Jaialdiaren baitan antolatzen da mikrokontakizunen lehiaketa eta honen helburua gazteek literatur jardueretan parte hartzea eta idazketa sortzailearekiko interesa sustatzea da.

14 eta 21 urte bitarteko gazteek har dezakete parte, eta egin beharrekoa kontakizun labur bat idaztea da, gehienez 240 karakterekoa. "Ahotsa entzun" adierazpena izan beharko du barnean. Mikrokontakizuna Instagram edo Twitterrera (X) igo beharko da #lumafestibalamikros traola erabilita eta @lumafestibala aipatuz.

Lanak euskaraz edo gaztelaniaz aurkez daitezke, lehiaketak kategoria bana baitu hizkuntza bakoitzerako. Kategoria bakoitzean, bi mikrokontakizun irabazle aukeratuko dira. Saria 180 euroko balioa duen liburu-sorta izango da. Parte hartzen dutenek nahi adina mikrokontakizun aurkeztu ahal izango dituzte, baina sari bakarra lortu ahal izango dute. 

Irailaren 3ra arte parte har daiteke, eta epea amaitzean, antolatzaileek testu finalistak aukeratuko dituzte. Jaialdian izango diren egileen laguntzarekin hautatuko dituzte mikrokontakizun irabazleak. Euskarazko kategoriaren irabazleak irailaren 13an iragarriko dira, eta gaztelaniazkoak irailaren 12an. 

Lehiaketaren oinarriak hemen kontsulta daitezke.