Libertimenduak igandetik aurrera hasiko dira

Maskaradak abian dira, eta libertimenduak igandetik aurrera izango dira martxan dantzan.eus webgunean iragarri dutenez. Honela azaldu dute libertimenduen etorrera: "Neguan jaun eta jabe izan dira zirtzilak, baina udaberria hurbiltzen ari den bezala dantzariak agertuko dira plazetan. Aurrez aurre edo elkarrekin izango dira Euskal Herriko zenbait plazetan antolatu diren libertimenduetan dantzariak, zirtzilak eta bertsolariak. Dantza, antzerkia eta bertsoa dira inauteri hauetako ezinbesteko osagaiak. Dantzari dotore, garbi eta mutuek pixkanaka zirtzil ilun, zikin eta kritikoen lekua hartuko dute  eta bertsolariek narratuko dute plazan gertatzen dena".

Libertimendua Nafarroa Behereko hainbat herritako inauterietan egiten den artedrama da. XX. mendeko zenbait garaitan ohiturak indarra galdu bazuen ere, azken urteetan indarra hartzen ari dira. 2005etik ari dira plazaratzen libertimendua Donibane Garazin, segidan heldu ziren Amikuzekoa eta Bankakoa, eta urtetik urtera herri gehiagotan ospatzen dira. Nafarroa Beherean ez ezik, euren ereduari jarraituta, 2019an Iruinkokoa kaleratu zuten Iruñean eta aurten Añorgan ere ari dira prestatzen lehenengo aldiz.

Igandean Baigurako libertimendua izango da Bidarraiko plazan, 10:00etan desfilea eta 10:30ean libertimendua. Eguraldi txarra eginez gero, aldiz, Makean egingo dute. Igandekoaren ondoren, honako hauek izango dira hitzorduak:

Otsailak 13, igandea

• Amikuzeko libertimendua. 10:00etan karrikan itzulia, 11:00etan libertimendua Donapaleuko plazan.
  

Otsailak 26, larunbata

• Añorgako libertimendua. 10:00etan abiatuko dira barrikadak eta 13:00ak bueltan emanaldia Harrobiaren plazan.
  

Otsailak 27, igandea

• Iruinkokoa (Iruñea). 9:30ean hasiko da inauteria eta emanaldia 13:00etan Santa Ana Plazan.
  

Martxoak 5, larunbata

• Baigorriko libertimendua. 10:30ean kabalkada eta emanaldia 11:00etan.
  

Martxoak 12, larunbata

• Hazparneko libertimendua.

Martxoak 13, igandea

• Oztibarreko libertimendua.

Garazin ere bazuten egiteko asmoa otsailaren 27an, baina bertan behera uztea erabaki dute, zirtziletan parte hartzekoa zen Leire Iribarne musikaria zendu baita pasa den astean. Gugan bego!