Odei Jainaga kirolaria pizti artean ikusi nahi al duzu?

Odei Jainaga kirolaria protagonista duen Piztien artean saioa estreinatu du Primeran plataformak. Munduan zehar bidaiatu eta piztien artean ibiliko da xabalina jaurtitzailea. Egoera arriskutsuak biziko ditu eta bere trebeziak erakutsi beharko ditu eibartarrak.

Sei atal izango dira guztira eta astero atal bat kaleratuko dute, ostiraletan, abenduaren 6ra bitarte. Amazonia, Tanzania, Thailandia, Uganda... bisitatuko ditu Jainagak eta egoera paregabeak biziko ditu, animaliaz inguratuta.

Lehen bi atalak jarri dituzte ikusgai. Lehen atalean, Amazoniako tribu indigena batekin aritu da ehizean, eta bigarrenean, berriz, Indian, montzoi garaian, sugeen artean, errege kobren artean hain zuzen ere, harrapatuta geratu da. Ostiralean estreinatuko duten atalean, Tanzaniara joango da sugeen tribua ezagutzera eta han Afrikako suge hilgarrienarekin topo egingo du.

Iban eta Maiteren ile-apaindegia ere zabalik
Iban & Maite Beauty saioaren bigarren denboraldia ere hasi da Primeran plataforman. Aurreko denboraldiko sei atalen ondoren, berriz ere ileapaindegiko ateak irekiko dituzte Iban Garciak eta haren amak, Maite Azpiazuk. Lehen atala zintzilikatu dute eta Gazteako Jon Gotzon Aldaparena izango da ile-apaindegiko bezeroa.