Primeran, euskarazko edukien plataforma berria, martxan da

Primeran, euskarazko eta euskal edukien doako streaming plataforma berria, joan den ostiraletik dago erabilgarri eta euskal edukiak bermatu, hedatu eta denentzat eskuragarri jartzea du helburu.

Ia eduki guztiak euskaraz edo euskal azpidatziekin daude, eta hiru mila atal baino gehiago izango dira bertan ikusgai. Euskal  ekoizpeneko eta nazioarteko telesailak, zinea, dokumentalak, kirolak, sukaldaritza, musika eta haurrentzako edukiak eskainiko dira bertan, baita plataformarako sortutako eduki esklusiboak ere.

Plataformaren estreinaldiarekin batera, Porno Belaunaldia dokumental saila ere estreinatu dute, euskaraz. Nerabeen eta sexuaren arteko egungo harremana erakusten duen saioa da, "lekukotasun eta datu argigarrien bitartez".

Irailaren 28an, berriz, Itxaso euskal thriller telesaila estreinatuko dute plataforman. Jon Plazaola, Nerea Mazo eta Itziar Atienza protagonista dituen euskarazko fikzio berria da. 

Film luzeak ere ikus daitezke gunean, hala nola Errementari, Erlauntza eta Nora, eta urrian estreinatuko dute El vasco. Nazioarteko telesailak ere badira, euskarazko azpidatziekin: Crazy fun park, Non zinen?, Derby girl, Bila nazazu Paris…

Dokumentalak, telesailak, marrazki bizidunak, kontzertuen emanaldiak... ere badira Primeranen. Datozen hilabeteetan musika, antzerki edota beste kultur adierazpen eta jaialdi askotako edukiak izango direla aurreratu dute. Zuzenekoak egiteko asmoa ere badute.

Hala, edukiak primeran.eus webgunean, SmartTV ezagunenetan, Google Play-n eta laster Apple App storean aplikazioa jaitsita, Chromecast bitartez eta Hbbtv-etan ikusi daitezke. Laster Android TVn ere izango da ikusgai. Doako plataforma da eta erregistratu egin behar da edukiak ikusteko.