SEXUMATOIA: AINHOA AZKUE

AINHOA AZKUE ‘NEBUKAI’ (ORERETA, 1996) SORTU BERRI DUGUN ‘GOSEX’ BIDEOPODCASTEKO AURKEZLEA DA. BIDEOPODCASTEAN BEZALA, NATURALTASUNEZ ETA IREKITASUNEZ HITZ EGIN DIGU SEXUARI BURUZ.

• Noiz eman zenuen zure lehen musua?
  Hamaika bat urterekin. Oso arraroa izan zen, pertsona berri guztiekin bezala.
• Zer da lehen begiratuan erakartzen zaituena?
  Irribarrea eta usaina. Kolonia goxoa badu, akabo!
• Kalabazak emateko edo jasotzeko modurik originalena?
  Meme graziosoren bat bidaliz.
• Zein da ligatzeko erabili duzun trikimailurik onena?
  Oraindik ez dut erabili, baina diru-zorroan kasinoko fitxa horietako bat izaten dut, gustuko dudan norbaiti emateko, “barkatu, hau erori zaizu” esanez.
• App-ak edota sare sozialak erabili al dituzu ligatzeko?
  App-ak noizbait bai, baina match egin eta zuzenean ghosting egiten dut.
• Sare sozialetan MZ-ak bidaltzen al dituzu ligatzeko?
  Ez naiz batere zalea, baina zeharkako mezuak bai, erreakziotxoak eta halakoak.
• Zer da sare edo aplikazio bidez ligatzerakoan gertatu zaizun gauzarik bitxiena?
  Habbo Hotel-en zazpi urtez nire bikotekidea izan zen pertsona ezagutu nuen.
• Zer menu prestatuko zenuke zita baterako?
  Pizza, eta postrea sorpresa.
• Zein da zurekin oheratzeko hobekien funtzionatu duen esaldia?
  “Gero goxo-goxo geldituko zara lo”.
• Maniarik ba al duzu oheratzerakoan?
  Garbitzea. Hasi aurretik eta bukatu ondoren.
• Pornoa ikusteko, bakarrik ala konpainian?
  Ez naiz batere pornozalea, baina, kontsumitzekotan, konpainian.
• Zein da etxean sexurako txokorik onena?
  Sofa eta dutxa!
• Inoiz harrapatu al zaituzte jo eta su?
  Garajera iritsi, kotxea aparkatu eta jo eta su hasi ginen… Bat-batean atea zabaldu zen; garajea partekatua zen eta lagunak etorri ziren kotxe bila. A zer barreak!

• Zein da zure fantasiarik zoroena?
  Izu-atakeak, zistitisa, zauriak eta halakorik gabe sexuaz gozatzea.
• Inoiz egin al duzu txortan leku publiko batean?
  Nire lehen esperientzia sexuala zazpi pisuko etxe bateko teilatuan izan zen.
• Larrutan egin duzun lekurik gogokoena?
  Sauna bero-bero batean.
• Sexuan izan duzun esperientziarik gozagarriena?
  Lehen aldiz emakumeekin esperimentatu nuenekoa. Bestelako sexua deskubritu nuen: naturala, enpatikoa eta segurua.
• Eta traketsena?
  Antsietate-atakeak izandakoak.
• Zer da probatzera ausartuko zinatekeen gauzarik bitxiena?
  Ez dut arazorik edozer gauza probatzeko, betiere kaka tartean ez badago.