[SEXUMATOIA] IBAI FRESNEDO: “Lagunen arteko orgia batean parte hartuko dut laster”

Zer telesail edo filmek jartzen zaitu bero-bero?
Bernardo Bertolucciren The Dreamers eta Emerald Fennellen Saltburn.
Zein pertsona ezagun iruditzen zaizu Euskal Herriko ‘sex symbol’-a?
Beñat Sarasola idazlea. Oso begirada polit, goxo eta sakona dauka.

Joango al zinateke zita batera itsu-itsuan?
Ez. Itsu-itsuan soilik "gela ilunetara" noa! Kar-kar!
Zer da zita batean inoiz esan behar ez dena?
Zure aurreko bikotekideei buruz hitz egitea. Ez, mesedez!
Zer da lehen begiratuan segituan erakartzen zaituena?
Bekainak eta ezpainak.
Zuk ematen al duzu lehen pausoa?
Batzuetan nik, baina beste norbaitek eman izan duenean, oso berezi eta desiratu sentiarazi nau. Bi rolak oso interesgarriak dira. Kalabazak emateko edo jasotzeko modurik originalena?
Ghosting-aren aroan, originalena zintzoa eta gardena izatea da.
Zein da ligatzeko erabili duzun trikimailurik onena?
Uste dut bakoitzak bere sedukziorako gaitasun propioak dituela, egunerokoan treba ditzakegunak. Nire kasuan, begirada.

App-ak edota sare sozialak erabili al dituzu ligatzeko?
Bai, Grindr edo Instagram. Beti ez naiz eroso sentitu, nahiko dinamika toxikoak topatu izan ditudalako. Azkenaldian, aurrez aurre ligatzeari zentzu, garrantzi eta praktikotasun handiagoa hartu diot.
Sare sozialetan zuzeneko mezuak bidaltzen al dituzu ligatzeko?
Bai, baina ez hainbeste ligatzeko asmoarekin, sexualki jolasteko baizik. Jendeak oso proposamen bitxiak egin dizkit DM bidez.
Zure lanbideak laguntzen al dizu ligatzen?
Ez, kontrakoa. Sexualitatea da nire lanbidearen eta militantziaren ardatz nagusietako bat, eta horrek jende askori atzera eginarazten dio.

Zein famaturi bidaliko zenioke DM edo mezu zuzena?
Zea Mayseko Aiora Renteriari, bere ahots liluragarria goraipatzeko. Benetan, ez dago beste ahotsik, entzuten dudan aldiro, oilo-ipurdia jarri eta hunkitzen nauenik.
Zer da sare edo aplikazio bidez ligatzerakoan gertatu zaizun gauzarik bitxiena?
Behin nire oinen argazki batengatik ordaintzeko prest zegoen tipo batek idatzi zidan. Egoerak asko berotu ninduen, baina argazkiagatik 5€ eskaini ondoren, proposamenari uko egin nion. Gutxi iruditu zitzaidan, miseria bat!
Zer menu prestatuko zenuke zita baterako?
Gonbidatu(ar)en gustu, behar eta hautu politikoaren araberakoa. Zita batean beste pertsona(k) ondo sentiaraztea eta zaintzea funtsezkoa iruditzen zait.
Inoiz eman dizuten gomendiorik onena ligatzeko? Eta txarrena?
Gomendiorik onena, nire eta bestearen nahiak eta mugak presente edukitzearen garrantzia. Txarrena, "lehenengo urratsa emateak lotsa ematen badizu, bidal ezazu lagun bat bitartekari lana egin dezan".

Maniarik ba al duzu oheratzerakoan?
Ez dut nire ohean galtzerdiekin sartzen den pertsonarik nahi. Ezin dut jasan!
Zein da zure fantasiarik zoroena?
Sexu askapenerako nazioarteko egunean (ekainak 28), manifaren manifestua irakurri ondoren, makro-orgia bat egitea gure hiri edo herrietako plazetan. Mitoaroa? Primeran! Baina noizko Akelarrearoa?
Zein da inoiz egin dizuten proposamenik zoroena?
Lagunen arteko orgia batean parte hartzea proposatu berri didate. Baiezkoa eman dut eta laster izango da. Denon agendak koadratu behar ditugu.
Zer gorputzeko atal ukitzea duzu gustuko?
Ilea, bere kokaleku, forma, luzera eta lodiera guztietan.
Zein da etxean sexurako txokorik onena?
Sofaren askotariko ertzek askorako eman dezakete. Plastikozkoa ez bada, noski!
Inoiz harrapatu al zaituzte jo eta su?
Askotan! Baita kaka egiten edo dutxa hartzen ere. Baina, tira, bueltan agurtu eta ni nirera!
Inoiz egin al duzu txortan leku publiko batean?
Bilboko Kafe Antzokiko komuna publikotzat hartzen da?

Larrutan egin duzun lekurik gogokoena?
Mexikoko Nayarit estatuko San Blas hondartzan, ilunabarraren paisaiak lagunduta.
Sexuan izan duzun esperientziarik gozagarriena? 
Kontrakoa badirudi ere, orgasmora edo eiakulaziora heltzea arautzat ez duten esperientziak oso gozagarriak izan daitezke. Eta horrelako hamaika topaketa bizi izan ditut, beste praktika eta sentsazio motei garrantzia ematen lagundu didatenak.
Eta traketsena?
Tira, behin larrutan egin nuen zero azpiko tenperatura zegoenean.
Fikziozko zein pertsonaia iruditzen zaizu 'sexy'-a?
Vikings telesaileko Ragnar Lothbrok.