Zer fabrikatu dute Errenteriako ikasleek Perura bidaltzeko?

Errenteriako Don Bosco ikastetxeko Produktu Farmazeutikoak, Bioteknologikoak, eta Antzekoen Fabrikazioa goi-mailako zikloko bigarren mailako ikasleek proiektu berezia izan dute eskuartean azken hilabeteotan. Perun iaz izandako uholdeak tarteko, denge-epidemia sortu da Piura Garaian. Egoaizia eta Zabalketa Gobernuz Kanpoko Erakundeek, hainbat dinamikaren bitartez, ikasleei bertako errealitatea ezagutarazi eta testuinguruan kokatzen lagundu diete. Hala, ikasleak eta erakundeak elkarlanean aritu dira arazoa konpontzen laguntzeko irtenbide bila.

Forma farmazeutiko likido eta erdisolidoen inguruko ezagutza jaso dute ikasleek, eta ondoren, eltxo-uxagarri proposamenak fabrikatu dituzte laborategi-eskalan. Haietako bat aukeratu eta eskala handian ekoitzi dituzte. Horretaz gain, Peruko baliabideak eta hemengoak ezberdinak direla kontuan izanda, hango lehengaiekin ekoitzi daitezkeen uxagarri-formula alternatiboak ere landu dituzte.

Hainbat material sortu dute ikasleek: Piura Garaiko denge-arazoaren testuinguruaren kokapena, ontziratutako eta etiketatutako eltxo-uxagarria, uxagarriaren formulazioa eta fabrikazio-urratsak, eta Piurako herritarrei zuzendutako produktuaren prospektua eta komunikazio-kanpaina (eskuorriak, abestiak, kartelak, eta abar).

Proiektu honetan sortutako ezagutza eta material guztia Egoaizia eta Zabalketa Gobernuz Kanpoko Erakundeek bildu dute, Peruko lankideei bidali eta erabil dezaten.